13-ամյա Գաբրիելա Հարությունյանը դարձել է Աբու Դաբիի 31-րդ շախմատային փառատոնի մինչև 13 տարեկան աղջիկների արագ շախմատի չեմպիոն։

Օգոստոսի 15-ից 24-ը Գաբրիելան մասնակցել է մրցաշարին Բիբլոս Բանկ Արմենիայի հովանավորությամբ, իսկ հոկտեմբերի 28-ից նոյեմբերի 8-ը, կրկին Բանկի ֆինանսավորմամբ, Մոնտենեգրոյում ուժերը կփորձի Եվրոպայի աղջիկների և պատանիների առաջնությանը։

2025 թ. Հայաստանի մինչև 14 տարեկան աղջիկների չեմպիոնն Աբու Դաբիում նաև մասնակցել է Ladies Blitz մրցաշարին՝ անցնելով կանանց լավագույն տասնյակ, ինչպես նաև մեծապես բարելավել իր վարկանիշը։

Գաբրիելան շախմատով զբաղվում է 5 տարեկանից։ Մի շարք մրցաշարերում նա տպավորիչ հաղթանակներ է տարել՝ տարբեր տարիներին նվաճելով Երևանի Մ10 տարեկան աղջիկների, Հայաստանի Մ10, Մ12 և Մ14 տարեկան աղջիկների առաջնություններում չեմպիոնի տիտղոսը, Եվրոպայի Մ10 տարեկան աղջիկների 4-րդ մրցանակը։

Դառնալով 2025 թ. Հայաստանի մինչև 14 տարեկան աղջիկների բացարձակ չեմպիոն՝ պատանի շախմատիստուհին ստացել է նաև ուղեգիր՝ շախմատի աշխարհի պատանեկան առաջնությանը մասնակցելու համար։

Գաբրիելայի մասնակցությունը հեղինակավոր մրցաշարերին կարևոր ձեռքբերում է նրա շախմատային կարիերայում և առանցքային տարր՝ Բանկի կրթական ԿՍՊ ծրագրերի շարքում։